Feel Home

لما بتكون مخنوق، أي حد بيحبك و بيحس بيك بيحاول يخرجك من مودك بأي شكل يضحكك، يخرجك، مبيبقاش عارف إنك ساعات بتكون محتاج تحزن بجد و يمكن الحاجة الوحيدة إللي ممكن تواسيك إنك تلاقي حد في موقفك، أما الحاجة إللي ممكن تخفف من حزنك شوية إنك تشوف حد في مشكلة أكبر منك، مش عشان إنت وحش أو بتحب الشر للناس، بس عشان مشكلتك بتكون أصغر جنبها...أنا بقه مقتنعة بإنك لو حسيت إنك مش لوحدك ممكن جدا تبقى كويس أو على الأقل هتتقبل مشكلتك بشكل أفضل بدل ما تبص لكل إنسان و تسأل نفسك تفتكر هو ممكن يكون إتحط في الموقف ده قبل كده!؟ و كأن محدش في الدنيا مر بالمشكله دي غيرك...رأيي شوية شبه رأي د. هشام في "إنت عمري" المرضى إللي بيعانوا من نفس المرض وجودهم مع بعض بيساعد على شفائهم

المدونة دي لأي حد. أصرخ، إبكي، كسر إللي إنت عايزه، إعترف بكل حاجة مش قادر تعترف بيها لأصحابها حب، كره، خوف... ، و ده مش معناه إن دي هتبقى مدونة كئيبه...أبدا

بالعكس أوعدكم إنها فعلا هتكون بيت...لكن بيت كل واحد؛ بيت إشتريته و عايش فيه لوحدك أو مع أصحابك، بحر، جنة، إعتبره أي مكان تتمنى إنه يكون بيتك لكن البيت ده مش مسؤليتي أنا لوحدي...لأ...مسؤليتنا كلنا

مش لازم تقول إنت مين ولا لازم تعرف أنا مين لكن لازم كلنا يكون أمين، لو هتكدب على نفسك فمتدمرش مجتمعنا الصغير بكدبك. و التعقيب على التعليقات مش مقتصر عليا، أي حد يحب يرد على أي حد يتفضل، أي حد يحب يقترح موضوع يتفضل. دي مدونة أي حد يحتاجلها